Lamentations 5

1Oh Thixo, khumbula okusehleleyo
khangela ubone ukuyangeka kwethu.
2Ilifa lethu seliphiwe abezizweni,
imizi yethu yathathwa ngabemzini.
3Sesizintandane ezingelaboyise,
omama sebenjengabafelokazi.
4Amanzi okunatha siyawathenga;
inkuni zethu zikhutshelwa imali.
5Labo abasixotshayo basihlezi ezithende;
sikhathele asilakuphumula.
6Sazinikela kwabeGibhithe labe-Asiriya
ukuze sizuze isinkwa.
7Okhokho benza isono kodwa kabasekho,
thina yithi esesijeziswa.
8Sibuswa yizigqili,
kakho osikhululayo ezandleni zazo.
9Isinkwa sisithola ngendlela eyingozi
ngenxa yenkemba ekhona enkangala.
10Isikhumba sethu sitshisa njengeziko,
silomkhuhlane wendlala.
11Abesifazane bayahlukuluzwa eZiyoni
kanye lezintombi ezigcweleyo emadolobheni akoJuda.
12Amakhosi alengisiwe ngezandla zawo;
abadala abasahlonitshwa.
13Izinsizwa ziyahoqiswa ematsheni okuchola;
abafana babhensiswa yimithwalo yenkuni.
14Abadala sebesukile esangweni lomuzi;
izinsizwa sezithule ukuhlabelela.
15Ukuthokoza akusekho ezinhliziyweni zethu;
ukugida kwethu sekuphenduke ukukhala.
16Umqhele usuwile ekhanda lethu.
Maye thina, ngoba sonile!
17Ngenxa yalokhu inhliziyo zethu zibuthakathaka;
ngenxa yalezizinto amehlo ethu ayafiphala,
18ngoba intaba iZiyoni silugwadule,
sekucathama amakhanka kuyo.

19Wena, Oh Thixo, busa nini lanini;
ubukhosi bakho buhlezi kuzozonke izizukulwane.
20Kungani uhlezi usikhohlwa?
Usifulathelelani isikhathi eside kangaka na?
21Sibuyisele kuwe, Oh Thixo, ukuze siphenduke;
buyisa kabutsha insuku zethu njengezakudala,
22ngaphandle kokuba nxa ususilahle kokuphela
wasizondela ngokungalinganisekiyo.